مالي خص بدياج المكاين، كلامي في دياجة البيت.. البحرانية الحليوة اللي بيضتها ما تعجب أولاد المكاين.. يقولون عنها (زفرة)!!
- ملاحظة: في ناس يقولون: دجاجه، وناس يقولون: ديايه. واحنا من الوسطيين اللي يقولون: دياجه. عشان محد يحط في خاطرة.
الدياج في زمن الأول يطلعون من البيوت ويدورون في الطريق طول النهار، ووقت الحاجية تحط ليهم بقايه الغدا، يجون يتراكضون، ويردون عقب الأكل يطلعون في الطرق لين ما تجي حزة النوم قبل المغرب يجون يتخطرفون ويدشون بيوتهم..
المشكلة وين؟
المشكلة الله يسلمكم إن الدياجة في زمن الأول قوية عيون، لأن طول يومها في الطريق تتمشى وتراكض قدام ديجة الفريق، فعاد (أستغفر الله) ديج البيت في داك الزمن حاله حال الجدار، لو يطيح تسندوا على غيره.. إي لا، ستين ديج في الفريق، فالدياج ما عندهم ديج رقم واحد ويبقى رقم واحد.. اليوم هالديج زين، ولو باجر شويه تخالف ويه الدياجه، فواجد عندها خيارات.. في غيرك يا أبو عرعور!
هو صدق البيضة في داك الزمن وش حلاوتها، لأن الدياجة تاكل من أكل البيت عيش ومرق ومجابيس وكلشي، فعاد بيضتها تطلع قوية ووش حلاوتها، لكن البلوة في قوة عيون الدياجة داك الزمن..
اليوم عندنا بيوت يربون دياج، لكن ما يهدونهم في الطرق.. دياجة اليوم ستوووورة وش حلاوتها، ولو تبطل ليها الباب، تروح تطل.. وترد تطل.. وترجع تركض تدخل بيتها وش حلاوتها.. وتحترم ديج البيت حدددها، لأن دياجة بيت لا، وأصلا الدياج اليوم لو يدخل عليهم ديج غريب جان سووا الوقعة.. صدق صدق صدق دياج اليوم دياج بيت..
دياج بيت يعني تربية البيت، مو تربية مني ومناك..
يارب تحفظ دياجنا.. اللهم اجعل دياجنا أسوة للحمام والسنانير والبط والبش وكل أنواع الرويحات (الأليفة) يا رب، بفضل الصلاة على محمد وآل محمد.
السيد محمَّد علي العلوي
14 جمادى الثانية 1438 هجرية