أرجوكم انشروووووه..

لا أدري أبالعربية الفصحى أتحدث أو بالعامية..

يا جماعة مو شي طبيعي هاده اللي قاعد يصير.. لا حرمة للوقت ولا احترام لخصوصيات الأوادم!

فهموني يعني ويش اتصالات الظهر وقت الغدا ووقت الراحة.. اتصالات في أنصاص الليالي، وإدا ما ترد يزعلون وتصير سالفة..

لا، ويقعد يلاحقكك.. من يشوفك (أون لاين) على (واتس أب) فبسررررعة يتصل عشان (يصيدك)!!

يا أخي الواحد ممكن يكون قاعد وما عنده شي أبدًا، لكن الوقت مو وقت اتصاااال.. يقولون: مو مشكله ان الواحد يتصل في أي وقت، واللي ما يبغي يرد فلا يرد وانتهى الموضوع ولا تسويها سالفة..

لا يا جماعة، القضية مو في أن يرد أو ما يرد.. القضية إن في شي اسمه خصوصيااااات، ومثل هذي الأوقات حتى القرآن الكريم عطاها اهتمام خاص وعناية خاصة..

شوفوا: (يَا أَيُّهَا الَّذِينَ آمَنُوا لِيَسْتَأْذِنكُمُ الَّذِينَ مَلَكَتْ أَيْمَانُكُمْ وَالَّذِينَ لَمْ يَبْلُغُوا الْحُلُمَ مِنكُمْ ثَلاثَ مَرَّاتٍ مِن قَبْلِ صَلاةِ الْفَجْرِ وَحِينَ تَضَعُونَ ثِيَابَكُم مِّنَ الظَّهِيرَةِ وَمِن بَعْدِ صَلاةِ الْعِشَاء ثَلاثُ عَوْرَاتٍ لَّكُمْ لَيْسَ عَلَيْكُمْ وَلا عَلَيْهِمْ جُنَاحٌ بَعْدَهُنَّ طَوَّافُونَ عَلَيْكُم بَعْضُكُمْ عَلَى بَعْضٍ كَذَلِكَ يُبَيِّنُ اللَّهُ لَكُمُ الآيَاتِ وَاللَّهُ عَلِيمٌ حَكِيمٌ).

خدمة الناس عز وشرف وفخر، وهاده شي مافيه كلام أبدًا.. لكن مو معقوله إن نسحق الحدود بينا وبين بعض، وإلا تعالوا نعيش كلنا في الطريق وبلا بيوت وبلا مصاريف ووجع راس..

شوف بالله عليك.. يتصل لك الظهر، وإدا قلت مي عدله ما أرد، ورديت، يقولك: سلام، إن شاء الله عاد مو نايم وأزعجتك؟

لا والله ياخوك نايم وفعلًا أزعجتني، لكن وش يقول الواحد مع هالزمن الأغبر اللي كلشي فيه صار معوكس، ولا احنا عارفين احنا الغلط لو هالحالة هي المدموره..

والله العظيم التواصل حليو ويشرح الصدر، عاد لا نعفسه بهالسوالف اللي صدق بايخه وتضيق الخلق..

لا واللي أزيد من هاده، يتصل لك حزة الصلاة، ونشوف في صلاة الجماعة تيلفون يرن وطبيعي ما يرد عليه، عاد تقول يفهم وما يرد يتصل؟ لاااا أبدًا وتأبى المروءة.. هههههه ديه ديه اتصال ورا اتصال، ومن نفرغ من الصلاة يرد عليه ويقول له: ياخوك كنت في الصلاة. وش تتوقع يجاوب؟ يقول: أي ميخالف لكن بغيتك في شي مهم؟؟!!!

عاد تعال شوف وش هو هالشي المهم!! تقول قرار ضرب سوريا في إيده وينتظر الإذن من هالمصلي!!

خلونا نركد شوي وبلا زهقه على هالتيلفونات كأنه مو شايفين خير يا كافي الشر..

خلوا الاتصالات تشتغل من فمان الصبح إلى قبل أدان الظهر، وبالنسبة للموظفين فميخالف تستمر لقبل الدوام.. وتالي بسسسسس إلى العصر الساعة أربع لو أربع ونص إلى قبل أدان المغرب، وتالي ترجع إلى تسع أو تسع ونص بالكثير..

تره صدق اللي قاعد يصير مو عدل كلششش، وشويه نحتاج نرفع (فضيلة) الإحساس عندنا.

السيد محمد علي العلوي

28 جمادى الأولى 1435 هجرية

30 مارس 2014 ميلادية